Auður Huld Kristjánsdótttir

2003-05-28T17:56:00.000-07:00

Góða kvöldið
þá er komið að því!! Öllum verkefnum lokið og ég voða ánægð með afraksturinn. Ég hef reyndar fundist svolítið óljóst með öll verkefnin þ.e. ég vona að ég hafi skilað öllu sem ég átti að skila. Það eina sem mér tókst bara ekki þrátt fyrir ítrekaðar tilraunir og bréfaskriftir það var að fá þennan blogger auglýsingalausan. Ég er búin að borga tvisvar ca. 1100 kr og senda nokkur bréf en ekkert gerist. Ég sagði Salvöru frá þessu en hef reyndar ekkert heyrt frá henni og vona bara að þetta eigi ekki eftir að draga mig mikið niður!!! En s.s. tel mig búna með öll verkefni og er marg búin að prófa allar tengingar og allt virðist virka.
Ég segi því bara takk fyrir önnina þetta hefur verið mjög gagnlegt fyrir mig og ég tel að ég eigi eftir að nota mikið það sem ég hef lært og er þá ekki tilganginum náð eða hvað???
Skilasíða
Kær kveðja og takk fyrir mig Auður

2003-05-26T15:44:00.000-07:00

Halló
Ég hef verið svo upptekin við verkefnin að ég hef bara alveg gleymt bloggernum. Þetta er allt að smella saman. Lokaverkefnið nánast tilbúið, vefleiðangurinn er eftir að fá útlitsuppliftingu og kennsluhugmyndin komin vel á veg. Þá er það bara að standa sig á lokasprettinum og ég stefni að því að skila á miðvikudag.... fyrir 12 á miðnætti.... Kveðja Auður

2003-05-19T16:29:00.000-07:00

Halló
Lokahnikkurinn byrfjar ekki vel! Þurfti óvænt að vera á hlaupum um bæinn í dag. Og þegar ég settist við tölvuna í kvöld þurfti líklega að brjótast í gegn ný tönn hjá Hildi og ég hef ekkert getað gert annað en stinga snuði og kæla góminn......... púff vonum að morgundagurinn verði betri. Nú er klukkan orðin margt og ég er alveg uppgefinn heilinn starfar ekki á réttum hraða fyrir frumlegar hugsanir. Kær kveðja Auður

2003-05-18T16:52:00.000-07:00

Halló
Það hefur lítið gerst um helgina hjá mér en búin að fá mikla pössun í næstu viku og nú er bara að setja í gang fyrir lokasprettinn. Stefnan sett á að allt sé tilbúið á mánudag eða kannski þriðjudag í næstu viku var það ekki annars í lagi til 1. júní?????
Kveðja Auður

2003-05-14T08:46:00.000-07:00

Jæja Þetta þokast!! Ég var að finna klippa og líma og breyta og bæta í gær og framhald í dag. Ég lofa að fara að setja þetta út á netið en hef átt í erfiðleikum með það þannig að ég var að reyna að geyma það þanngað til meira er tilbúið. Annars gegnur þetta nokkuð vel og maður gleymir sér alveg í þessu. Verst að þetta er "bara" ca. 40 stunda vinna!!!! Prinsessurnar eru hressar og kátar og gefa ekkert eftir í rólóferðum!!!

2003-05-12T15:51:00.000-07:00

Halló
Var að vinna í síðunni þ.e. lokaverkefninu ætla þó ekki að setja það út á netið alveg strax þetta er allt í vinnslu. Sett inn svolítið að efni er búin að setja tengla og næst á dagskrá er að fá merki DV, Fræðslumiðstöðvar R. og Moggans inn á síðuna. Meira síðar Kveðja Auður

2003-05-08T15:06:00.000-07:00

Halló
Þó svo að lítið sjáist er ég eitthvað að reyna að bralla í laumi. Ég hef aðeins verið að spá í hvernig ég eigi að setja fram það efni sem ég á og hef líka verið að flokka það svolítið. Annars allt í besta lagi. Ég að fara í orlofsferð.. ........... þ.e. saumaklúbburinn að fara í sumarbústað um helgina maka og barnalausar. Ég var nú samt að spá í að lauma 3 aðilanum með þ.e. tölvunni. Svo get ég kannski laumast inn í herbergi og þóst leggja mig en verið að vinna í síðunni. Litlurnar voru í 18 mánaðaskoðun í dag og voru ekki hrifnar af lækninum. Það var ekki nóg með að hann þyrfti að glápa í eyrun, munninn og allt það heldur gerði sprautan nú alveg útslagið. Þegar þær fæddust munaði 300g á þeim og síðan hefur alltaf munað 300 - 400 g á þeim og það var eins núna það munaði 400 g og 0,5 cm . kær kveðja og meira eftir orlofshelgina miklu........

2003-05-05T14:01:00.000-07:00

Halló
Jæja núf er ég byrjuð í sumarkúrs og ekki er þó endanleg mynd komin á lokaverkefnið það er enn í smíðum og þó mest í huganum en þó eitthvað komið á síðunna en ég hef ekki uppfært hana út á netið. Ég er líka í hjáverkum að vinna vefleiðangurinn og svo á ég eftir að skila einu verkefni þ.e. hugmyndinni af kennslutíma eða námskeiði. Ég held að ég einbeiti mér að hinu fyrst til að hafa ekki of mörg járn í eldinum. Ég á svo sem efni sem ég hafði hugsað mér að bæta aðeins og breyta og nota það er það ekki annars leyfilegt? Síðustu dagar hafa aðallega farið í að þurrka hor hjá mér. Annars eru þær brattar 18 mánaða í dag og nú er það bara að fara að storma á gæsló!! Vei vei búin að bíða eftir þessu nokkuð lengi.... Kveðja Auður

2003-05-01T14:11:00.000-07:00

Halló
Jæja síðustu daga hef ég svolítið gleymt mér í ýmsum erlendum síðum um dagblöð í skólum. Það er greinilega til urmull af efni það eina sem ég þarf er meiri tími. Það er svo svakalega auðvelt að gleyma sér að skoða eitthvað sem manni finnst spennandi. Það hefur því lítið verið framkvæmt þ.e. af einhverju sjáanlegu en þetta flokkast líklega undir forvinnu. Annars er allt gott að frétta af systrunum þær eru hressar eins og venjulega amma Pálína kemur á morgun og ætlar að passa meðan ég fer í skólann.
Kveðja Auður

2003-04-27T15:20:00.000-07:00

Lýsing á lokaverkefni:
Ég hef hugsað mér að gera heimasíðu ffyrir verkefnið Dagblöð í skólum. Þar hef ég hugsað mér að verði almennar upplýsingar fyrir kennara um verkefnið og hvernig þeir bera sig að sem vilja taka þátt. Einnig hef ég hugsað mér að hafa þar verkefni og tengingar í erlendar síður sem fjalla um efnið og auðvita verður tenging til þeirra sem stanfda að verkefninu þ.e. Fræðslumiðstöð, DV og Morgunblaðið. Verkefnið hefur miðast við 3. og 7. bekk þannig að ég miða við þann aldur. Uppkastið er komið hvað útlit varðar en þetta á örugglega eftir að breytast. Dagblöð í skólum

2003-04-27T15:14:00.000-07:00

Halló
Ég er búin að vera að vinna svolítið í lokaverkefninu það gengur ágætlega en ekkert er komið út á vefin ennþá nema uppkastið sem þið getið skoðað. Ég hef aðeins verið að skoða síður til að tengja við mína og þá eru Norðurlöndin ofarlega á baugi. Ég var að átta mig á því að næsta önn er að byrja og ég á að mæta á föstud. og laugard. í skólann ég var bara ekki alveg viðbúin!! En best þá að fara að senda út neyðarkall til ömmusveitarinnar og vita hver vill passa!!! Annars er ég lítið búin að sitja við um helgina þar sem veðrið var svo gott að við vorum að girða í dag og gær og nú er komið skotheld girðing fyrir systurnar og þær ættu varla að sleppa svo auðveldlega í burtu.
Kveðja Auður

2003-04-22T15:53:00.000-07:00

Halló
Jæja þá erf ég öll að koma til. búin að vinna upp mikinn póst og svara og spuklera í ýmsum málum. Sá að Salvör varf búin að setja saman fyrirlesturinn minn og fsendan út á alla! Ég er ekki með mjög öfluga tölvu þannig að ég bíð spennt eftir að skoða þetta þegar ég kemst í réttu græjurnar. Annars fékk ég póst frá manni sem vildi vísa í verkefnið mitt í tölvupóstriti sem hann er með og ég samþykkti það enda kannski halda þá einhverjir að ég sé kannski eitthvað flínk!!!!! Kennsluvefurinn er kominn aðeins niður á blað sem hugleiðing. Ég á nóg aff efni en þarf að setja það saman og breyta og bæta ftil þess að hafa þetta allt sem best!
Meira mjög fljótlega
Góða nótt Kveðja Auður

2003-04-21T14:02:00.000-07:00

Halló Gleðilega páska
Ég hef ekki getað skrifað mikið upp á síðkastið enda legið mest í rúminu eða verið inni á salerni!! þið skiljið þetta er nú samt allt að koma vona ég. Það hefur því lítið farið fyir tölvumálum hjá mér en ég verð að vera tvöfalt öflugri í vikunni.
Kveðja fog meira fljótlega Auður

2003-04-09T16:13:00.000-07:00

Halló
Jæja það er alltaf sama sagan maður er að fljúka á síðustu stundu. Ég var alveg róleg búin að klára síðuna mína og komin með uppkast af kennslufræðisíðunni þegar ég lenti í vandræðum með að koma þessu út á netið en það er komið núna nema kennslufræðisíðan hún neitar að fara enda ekki nema uppkast! Ég held ég reyni ekki meira núna því þá getur verið að ég skemmi eitthvað í reiðikasti. Ég er ágætlega sátt við það sem ég hef gert a.m.k þangað til ég fæ álit "fagmanna". Ef þið viljið fá forskot á sæluna þá er bara að kíkja á síðuna. Það er reyndar eitt sem ég er ekki alveg sátt við. Myndirnar í albúminu eru líklega of stórar það tekur of langan tíma að hlaða þær inn. En þetta verður að duga í bili en ég vona að ég læri betur á þetta í lotunni og geti haft þetta fullkomið í enda námsins!!!

2003-04-08T15:34:00.000-07:00

Hæ hó
Jæja þá fer að styttast í næstu lotu. Ég er búin að finna fyrirlesturinn góða og ætla að leggja lokahönd á síðuna mína á morgun. Vona að það gangi allt vel. Mér líst líka nokkuð vel á partýhaldið á föstudagskvöldið. Ég var líka að leggja lokahönd á barnpíuplanið og ömmur og vinkonur koma þar sterkar inn. Annars er hér búið að vera gubbað þvers og kruss!!! En við vona að það sé nú búið. Margbletturinn góði er í hámarki núna og litla anginn er allur blár og marinn. En fólk sem ég hitti í dag fannst þetta svo sem ekki svo slæmt og þær voru kallaðar réttum nöfnum í allan dag.
Góða nótt.................... sjáumst hress á fimmtudagsmorgun þ.e. eitthvað að ykkur þarna úti

2003-04-07T09:39:00.000-07:00

Halló
Það hefur lítið gengið hjá mér í dag þar sem ég er búin að vera að vesenast með skattaskýrsluna en þetta er að takast hjá mér og ég verð í góðum gír í kvöld og næstu kvöld að gera allt klárt fyrir staðbundnu lotuna. Ég hef átt í smá vandræðum með skjáin hjá mér ég get ekki minnkað eða stækkað á honum. Þarf að fá aðstoð með það. Meiri fréttir fljótlega

2003-04-06T15:42:00.000-07:00

Góða kvöldið
Ég hef ekki skrifað í svolítinn tíma vegna mikilla anna. Ég er enn að reyna að vinna í síðunni og það gengur ágætlega. Ég ætla að vera tilbúin með mína einkasíðu á föstudaginn og láta meta hana. Ég á fyrirlestur á power point sem ég hef haldið nokkrum sinnum fog ætla að mæta með hann í vasanum og setja inn talið. Þetta lýst mér ágætlega á ég þarf væntanlega að halda nokkra sömu fyrirlestrana næ´sta haust og sé fyrir mér að geta verið í fríi bara sett allt í gang og farfið í kaffi!!! Nei nei ég segi nú bara svona þetta er spennandi og gaman að sjá og prufa. Ég á eftir að skanna inn myndir fyrir síðuna mína en ég er ekki svo heppin að eiga digital vél eins og það væri nú gaman!! En skanninn klikkar ekki! og bráður getið þið lesendur góðir séð nýjustu myndirnar að skvísunum mínum. Við voru að koma úr sumarbústað þar sem við eyddum helginni ásamt tengdó sem varð 60 ára á föstudaginn. Það var svaka veisla og hátíðarhöld alla helgina. Hildur og Harpa voru hressar en Hildur áttaði sig ekki alveg á þröskuldunum í bústaðnum og eftir nokkrar veltur yfir þá kom svaka skellur og þessi líka fíni margblettur þvert yfir andlitið. Hún er alveg svakaleg en góði punkturinn er að nú þekkjast þær í sundur. Jæja það er mikil tölvuvika framundan hjá mér. Þar sem datt úr nokkrir dagar í síðustu viku þá þarf að reyna að vinna upp ekki satt!!! Kær kveðja Auður

2003-03-31T08:43:00.000-08:00

Halló
Þá er verkefni 3 í höfn efttir þó nokkra vinnu. Þetta gekk þó vel en þetta tekur auðvita allt sinn tíma. Nú get ég farið að einbeita mér að síðugerðinni en mér finnst ég samt ekki vera alveg með á hreinu hvað það er sem ég á að vera búin að gera í næstu lotu. Ég hef verið að vinna áfram í Dreamweaver og það er að fæðast ný síða hjá mér. Ég fór að nota layer og mér finnst það miklu betra að vinna með. Ég komst ekki í skólann á laugardaginn og kemst heldur ekki næst þar sem tengdamóðir mín verður 60 ára og svaka hátíð í sumarbústað alla helgina. Bloggerinn verður því að vera óbreyttur en ég hef ekki fundið þetta control. com sem hún Salvör benti okkur á ég kemst ekki inn á það. Annars eru stelpurnar mjög hressar. Fórum á rólo í morgun og lentum í svaka dembu en enginn er verri þó hann vökni!!!

2003-03-27T14:23:00.000-08:00

Halló
Jæja ég er núna byrjuð á verkefni 3 eða rannsókninni hjá Sólveigu er búin að fylgjast með 2 nemendum og fer í hina 2 á morgun. Stefni svo á að kóða upplýsingar um helgina. Annars held ég að ég sé í ágætum málum veit ekki annað en ég sé búin að skila því sem átti að skila. Vefleiðangurinn og mín einkasíða eru að smella saman. Ég var að reyna að fara inn á slóðina til að laga auglýsingarnar sem Salvör benti á en það gekk ekki þarf að reyna aftur og aftur.
Af ungunum er allt gott að frétta fórum fína ferð út á róló í dag og þar var smakkað á sandi og steinum bara svona aðeins. Ég verð samt að viðurkenna að ég er orðin svolítið þreytt á þessari veðráttu mér finnst búin að vera rigning eða rok allan febrúar og mars. Ég vill fara að fá vor. Kær kveðja Auður

2003-03-26T06:50:00.000-08:00

Halló
Ég fór að stúdera Dreamweaver með góðri hjálp og það opnaðist fyrir mér nýr heimur. Ég er núna að vinna í minni einkasíðu það gengur vel og þetta verður vonandi voða fínt hjá mér a.m.k miðað við síðustu skil!! Ég fór að nota layer og mér finnst miklu betra að vinna með það. Ég fer að setja þetta út á netið fljótlega. Ég er búin að fá fórnarlömb í rannsóknina og leyfin eru í höfn núna er það bara að fara í tímana og fylgjast með það er á dagskrá á morgun og föstudag. Bóndinn er forðinn frískur og stelpurnar eru mjög frískar. Ein flugferð niður úr rúminu í gær smá margblettur á einni kinn. En það er ekki verra nú er hægt að þekkja þær í sundur!! Jæja eitthvað að gerast í vagninum úti besta að hafa þetta ekki lengra að sinni.

2003-03-23T13:31:00.000-08:00

Góða kvöldið
Það gengur hægt með verkefni 3. Ég hef ekki komist mikið úr húsi síðustu vikur og varð því að biðja um skilafrest á því verkefni. Ég er heldur ekki í kennslu þannig að ég þarf að stela nemendum annarra og ætla að senda út leyfisbréf á morgun. Ég var líka að uppgötva það að líklega hef ég ekki skilað verkefninu 1.mars alveg öllu því að ég held örugglega að ég hafi ekki sagt frá hugmyndum mínum um eigin vefsíðu þ.e. þessa persónulegu. Hér kemur lýsing á henni og vona ég að það sé ekki um seinan. Ég ætla mér að hafa síðuna þannig að ég segi frá sjálfri mér og mínum störfum. Ég ætla að hafa myndir af mér og fjölskyldu minni og vona að ég geti verið dugleg að setja þar inn nýjar myndir reglulega. Einnig ætla ég að hafa tengingar í ýmsar síður sem vekja minn áhuga og tengjast því sem ég er að vinna í og með. Ég ætla að hafa tenginu í blogg síðu þar sem ég ætla að segja fréttir að stlepunum mínum þannig að vinir og ætingjar í útlöndum geti fylgst vel með þeim. Ég hef verið að reyna að krafla mig áfram með útlit en hef verið frekar einhæf í þeim málum. Ég fékk góðar hugmyndir á laugardaginn í KHÍ en því miður gat ég stoppað stutt og ætla þó að reyna aftur næsta laugardag. Að lokum smá fréttir úr heimilislífinu stelpurnar eru að hressast og sváfu úti í dag í fyrsta sinn í hálfan mánuð vegna veikinda en útlitið er ekki gott þar sem bóndinn liggur nú og skelfur úr kulda undir sæng og teppi ætli ég verði ekki að hjúkra honum eitthvað næstu daga. Spurningin er bara hvort ég haldi velli?????

2003-03-20T14:14:00.000-08:00

Halló!!
Jæja ég hef lítið getað gert undanfarna daga þar sem smá eyrnarroði og vökvi í eyra var að hrjá aðra stelpuna mína. Hún er búin að þurfa mikla athygli og við höfum lítið komist út. Þá er yfirleitt öll orka búin á kvöldin þegar það er tölvutími hjá mér. Hér var t.d. gert smá hlé til að róa hana niður. Þetta verður líklega annasöm nótt. En vonum það besta. Hvað varðar verkefnin sé ég það að ég er orðin of sein með það sem á að skila á sunnudaginn var einhverja hluta vegna búin að taka í mig að það ætti ekki að skila verkefninu hjá Sólveigu fyrr en í apríl. Ég bíð spennt eftir að hitta einhvern snilling í Bloggi á laugardaginn og fá smá leiðbeningar með útlitsbreytingar og auðvita auglýsingarnar frægu!! Sjáumst á laugardaginn.

2003-03-16T12:37:00.000-08:00

Góða kvöldið!
Jæja þá er verkefni 2 í höfn og hér eru slóðirnar íslenska útgáfan og enska útgáfan
Kær kveðja Auður

2003-03-15T14:10:00.000-08:00

Góða kvöldið!!
Þetta er ótrúlegt það er laugardagskvöld og klukkan 22 og ég að vinna og vinna. Ég var voða ánægð með mig að hafa skilað verkefni 1 þann 12. mars en þá bara birtist fyrri hlutinn en ekki sá seinni ég vona að hann skili sér. Ég hef verið að vinna í verkefni 2 en mér finnst svolítið erfitt að líta á mig sem "sérfræðing" á sviði UT því ég hef ekki komið svo mikið nálægt þessu en hins vegar villtist ég inná þennan ágæta áfanga í námi mínu í kennslufræði og námsefnisgerð. Mér finnst þetta spennandi og skemmtilegt en verð stundum svolítið utangátta þegar ég þarf að gera eitthvað tæknilegt. Það sem á hug minn allan núna er dagblöð sem kennsluefni og ætla ég mér því að reyna að tengja það þessu námi og er þá að spá í möguleika á að nýta fjölmiðla á vefnum í kennslu. Hljómar þetta ekki vel!!! Einnig finnst mér það hamla mér töluvert að ég er ekki í kennslu núna ég er en að hluta til í barneignarleyfi. Ég held þó ótrauð áfram sendi ungana mína með pabba sínum í afmæli á morgun til þess að fá frið til að klára. Ég ætlaði að klára þetta í dag en þá þurfti hann að fara að vinna og ég að hugsa um stubbana!! Annars eru þær að hressast af kvefinu og farnar að sinna sínum verkefnum þ.e. klifra upp á húsgögn og fara með móður sína á taugum. Það sem þeim finnst sniðugast þessa stundina er að fara sjálfar með bleijuna sína í ruslið !! Gera aðrir betur. Ef svo ólíklega vill til að tæknin bregðist ekki koma síðurnar (verkefni2) hér inn á morgun. Kveðja Auður

2003-03-12T13:37:00.000-08:00

Verkefni 1 hjá Láru seinni hluti:
Ut ráðstefna á Akureyri 2003

Sýnistofa um menntagatt.is
Sigrún Eva Ármannsdóttir

Ég fór á laugardagsmorgninum og hlustaði á Sigrúnu Evu segja frá Menntagátt.is. Menntagáttin er þannig hugsuð að kennarar setji inn efni sitt þannig að það verði aðgeingilegt öðrum kennurum. Hugmyndin er að kennarar geti farið inn á síðuna og náð sér í efni fyrir ákveðna námsgrein og fyrir ákveðinn aldurflokk. Þannig er þetta eins konar gagnasafn sem er opið öllum. Það er nýlega búið að opna þessa síðu og allir geta sett þar inn efni í framtíðinni er hugmyndin að hafa nokkurs konar ritstýringu þ.e. allt efni sem kemur inn er skoðað og þannig á að reyna að koma í veg fyrir óæskilegt efni.
Kostir við síðu sem þess finnst mér vera að það er auðvelt að nálgast kennsluefni, fleiri fá að njóta verkefnanna og ef kennarar sameinast um að setja upplýsingar inn á síðunna ætti þetta að verða góður gagnabanki.
En á öllum málum eru tvær hliðar og ég tel hættuna ver þá að kennarar verði ekki nógu virkir að setja efni inn á síðuna. Einnig eru eflaust einhverjir sem vilja fá eitthvað fyrir efnið sem það er að leggja fram því oft liggur mikil vinna á bak við stór verkefni.
Að mínu mati er hugmyndin góð og mér finnst að kennarar ættu að nýta sér þennan vef það þarf jú ekki alltaf að vera að finna upp hjólið!!

2003-03-12T13:35:00.000-08:00

Verkefni 1 hjá Láru:
Ut ráðstefna 2003 Akureyri

Rannsókn á Íslenskum heimasíðum
Ásrún Matthíasdóttir Háskólanum í Reykjavík

Ásrún sagði frá rannsókn sem hún ásamt nemenda sínum gerði á íslenskum vefsíðum. Skoðaðar voru 29 vefir eða heimasíður ýmisa fyrirtæka. Einnig 8 vinsælustu síður á þeim tíma. Vefirnir voru metnir útfrá kenningum Jakobs Nilsen um útlit og innihald vefsíðna. Niðurstöðurnar voru svo bornar saman við niðurstöður frá USA. Rannsóknin var styrkt af nýsköpunarsjóði námsmanna.
Það sem metið var var m.a.:
Markmið síðunnar, upplausn, nýting og hvað væri frábrugðið því sem gegnur og gerist.
Eins og áður sagði var farið eftir ákveðnum kenningum um útlit og innihald vefsíðna. Það sem skipti máli var:
Hleðslutími
Ekki átti að nota ramma
Logo átti að vera efst í vinstra horni
Leit ofarlega á síðu í hvítum glugga
Ekki átti að vera “skvettusíður”
Upplýsingar um fyrirtæki átti að koma fram
Ekki var gott að hafa tónlist
Stafastærðin skipti máli
Hlekkir áttu að skipta um lit
Útkoman var sú að Íslendingar virtust nýta plássið ver en þeir Bandarísku eða 39% var ónotað á móti 25% . Hins vegar virtust íslensku vefirnir vera í stöðugri þróun. Það sem helst var ábótavant var hleðslutíminn og stafastærðin. Annað var í mörgum tilfellum í þokkalegu lagi.
Eftir fyrirlestur Ásrúnar var talað um það hvort ekki vantaði íslensk viðmið til að vinna eftir. Þá var einnig ræt að jafnvel væri betra að hafa mikið ónotað svæði en að hafa ofhlaðina síðu þar sem erfitt væri að finna hluti.

Mér fannst gaman að heyra þennan fyrirlestur og þar sem ég er að móta mina eigin síðu í náminu fannst mér gott að fá hugmyndir og vita að til eru ákveðnir staðlar um uppsetningu. Hins vegar finnst mér vanta íslenska staðla til að fara eftir. Mér finnst að það geti verið til bóta ef vefir eru með svipaða uppsetningu því það tel ég geta auðveldað fólki að leita eftir upplýsingum.

2003-03-12T03:49:00.000-08:00

Mér tekst hreinlega ekki að fá´auglýsingarnar í burtu. Nú er ég búin að reyna og gerði þetta alveg samkvæmt uppskrift að ég hélt en ekkert gerist!!

2003-03-11T14:56:00.000-08:00

Halló!
Ég var að skoða póstinn frá Salvöru og er ekki alveg búin að átta mig á verkefni 2 hjá Láru. Einnig finnst mér dagsetningarnar hjá henni mjög dulafullar og passa alls ekki við mitt dagatal. En sjáum hvað setur. Ég hef verið að vinna í vefleiðangrinum og minni persónulegu síðu en þetta mætti allt ganga hraðar hjá mér. Mér finnst fara svo mikill tími í að leita að myndum og skrauti einnig í tengingar og tæknimál. Ég ef samt á tilfinningunnni að ég sé ekki alveg á réttri leið. Mér finnst að ég hafi misst svolítið úr eða sé bara ekki alveg nógu klár á tölvuna og fæ því stundum þá tilfinningu að þetta gangi ekki hjá mér. En það koma bjartir tæimar inn á milli sérstaklega þegar eitthverjum áfanga er náð og þá er gaman!!!! Verkefni 1 hjá Láru birtist hér á morgun það er í lokavinnslu.
Annars eru búin að vera veikindi á heimilinu. Ég hef verið að hlaupa með eldhúsrúlluna á eftir stelpunum mínum þeim finnst ekki gaman að láta sníta sér. En hinir elskulegu Stubbar hafa bjargað málum á heimilinu síðustu daga þetta er mjög gáfulegt sjónvarpsefni svo ekki sé nú talað um Söngvaborgina sívinsælu!!
Kveðja Auður

2003-03-07T13:41:00.000-08:00

Halló! Jæja nú er þetta allt farið að ganga betur og ég vona að þessi skrif birtist fljótlega. Ég held að ég sé búin að gera það sem ætlast var til 1. mars. Ég var reyndar of sein en það var vegna tölvubilunnar. Ég er núna að vinna að vefleiðangrinum og svo er ég að reyna að bæta síðuna mína. Ég kemst því miður ekki í tölvustofuna í fyrramálið því maðurinn minn er erlendis og einhver þarf að vera með litlu skvísurnar mínar. Þær eru reyndar á mörkunum að veikjast en ég vona bara það besta að þetta sé smá vetrarkvef sem verði ekkert meira. Ég hefði hins vegar þurft að koma því mér gengur ekki nógu vel með þessa vefdagbók en verð víst að reyna næst. Það er víst ekki fyrr en 22.mars.

2003-03-04T13:42:00.000-08:00

Halló af hverju birtist ekki það sem ég er að skrifa???? Nú er þolinmæðin alveg á síðast með þennan vefpóst..........
Enn reynum þó aðeins meira.

2003-03-03T05:32:00.000-08:00

Halló
Jæja ég sat sveit í allt gærkvöld og var að vinna í Dreamweaver og ég fékk pössun í dag til að geta haldið áfram. Þetta gengur ágætlega vefrallýið að verða til og ég var komin með hugmynd af vefleiðangrinum þannig að ég þarf bara að setja hann inn í tölvuna. Vona að það gangi vel. Vefslóðin hjá Auði

2003-03-02T13:11:00.000-08:00

Halló og takk fyrir síðast voðalega fannst mér gaman á Akureyri. Fyrir utan eina málstofu sem ég fór á fannst mér ég velja ágætlega og efnið henta mér sæmilega. Mér finnst þó að það mætti vera betri lýsing á innihaldi dagskrárinnar þar sem titlarnir sögðu oft á tíðum ekki alla söguna. Nú var ég að fá aftur Dreamweaver inn á tölvuna hjá mér þannig að ég er byrjuð að vinna á fullu þar sem ég er þegar orðin of sein en var búin að láta Salvöru vita því ég lenti í miklum tölvuvandræðum. Ég vona að þetta sé þó allt að komast á rétt skrið og mér ætti að takast að skila öllu á næstu dögum.
Þegar ég lenti á Reykjavíkurflugvelli kl. 19:10 á laugardaginn beið mín fríður hópur þ.e. litlu dætur mínar tvær og maðurinn minn. Þau voru mjög glöð að sjá mig og þær vissu ekki í hvað átt þær áttu að reyna hlaupa fyrir kæti. Þær eru eins árs og skildu lítið í því hvað hafði orðið um mig í þessa daga.
Jæja nú vona ég bara að allt fara að ganga vel en verum ekki of viss..........................

2003-02-26T14:10:00.000-08:00

Halló jæja ég fékk tölvusnilling í heimsókn og hann tók drauginn úr tölvunni með því að ýta á þennan fína refresh takka og allt fór í lag. En það gengur þó ekki allt svona vel núna. Því að þegar ég fékk tölvuna aftur úr viðgerð var ekki allt þar sem það átti að vera á harða disknum. T.d. hvarf Dreamweaver og eitthvað af gögnum. Ég fæ ekki forritið aftur fyrr en eftir helgi en ég er búin að láta Salvöru vita að ég verð of sein að skila. Ég er þó búin að undirbúa mig vel og verð vonandi ekki lengi að klára það sem eftir er þ.e. ef svo ólíklega vill til að ekkert klikki hjá mér. Núna er það s.s. bara að einbeita sér að ráðstefnunni. Ég fer á morgun þar sem ég þarf að fara á fund eftir hádegi og verð því bara að dingla mér eftir hann og fram á föstudag þegar þetta byrjar. Ég vona að hér með sé ógöngur í tölvumálum lokið hjá mér .......
Sjáumst á Akureyri á föstudag Kveðja Auður

2003-02-26T05:13:00.000-08:00

Halló ég er að reyna að skilja hvað er í gangi hjá mér með þessa síðu. Þegar ég fór inn á hana í annari tölvu í gær voru skilaboð frá mér inn á en nú eru þau horfin er draugur í þessu eða hvað??

2003-02-25T12:37:00.000-08:00

Það gegnur illa að senda út skilaboðin þau virðast hverfa veit ekki hvaða draugur hefur komist í tölvuna mína.

2003-02-25T12:36:00.000-08:00

Halló Eitthvað gerðist og mörg skilaboð frá mér eru horfin!!!

2003-02-24T13:49:00.000-08:00

Halló er eitthvað að virka hjá mér núna?? Það virðist ganga hægt!

2003-02-19T13:04:00.000-08:00

Halló !!
Nú er illt í efni Tölvan mín góða ákvað að fara í verkfall og einn daginn vildi hún ekki starta!! Síðan hef ég haft samband við alla helstu tölvukalla sem ég þekki og engin skilur neitt!! Þannig að ég fór með hana í viðgerð í gær og nú bíð ég milli vonar og ótta hvort það verði hringt í mig og mér tilkynnt um dauðdaga hennar. Ég bara vona það besta. Þess vegna hef ég verið léleg við að skrifa en á góða að og hef nú sest að hjá tengdaforeldrum mínum og ætla nú að vera dugleg að skrifa á næstu dögum. Það er jú það eina sem ég get gert þar sem öll gögnin mín eru á tölvunni minni góðu...... Kveðja Auður

2003-02-08T04:05:00.000-08:00

Halló hef víst verið léleg að skrifa !! Ég er að reyna krafla mig áfram og er nú búin að vera að skoða Fireworks. Nú er síðan og vefrallýið næst á dagskrá. Meira fljótlega

2003-02-01T13:37:00.000-08:00

Komið þið sæl!
Það er mér sönn ánægja að tilkynna að mér tókst loksins að tengja vefsíðuna mína út á netið. Ég fékk góðar leiðbeiningar í morgun hjá Salvöru. Rendar gleymdi ég flobby disknum mínum í tölvustofunni og þar eru allar myndir og skraut sem átti að fara á síðuna. En þetta er uppkast eins og beðið var um og þá hef ég lokið verkefnunum fyrir þessa lotu. Vefslóðin hjá Auði

2003-01-31T14:52:00.000-08:00

HÆ HÆ
Nú er svo komið að ég er um það bil að bilast!!! Ég er með nákvæmar leiðbeiningar fyrir framan mig að reyna að tengjast vefsvæðinu en það gengur ekki!!! ´Nú vona ég bara að það komi einhverjir snillingar í tölvustofuna á morgun og hjálpi mér. Ég held að ég hætti núna áður en ég geng í skrokk á músinni eða eitthvað þaðan í verra!!!

2003-01-31T13:46:00.000-08:00

Ef ég skil leiðbeiningarnar rétt þá get ég ekki sett inn mynd nema hafa auglýsingalausa síðu. Ég hélt reyndar að ég væri búin að biðja um það og fékk rukkun á reikninginn minn núna um mánaðarmótin þannig að ég þarf líklega að senda bréf og athuga málið. Ég er að reyna að basla við að koma heimasíðunni inn það gegnur svona la la!!!!

2003-01-31T06:09:00.000-08:00

Hugmynd um vefrallý
Þar sem ég hef mikinn áhuga á að nota dagblöð í kennslu þá ætla ég að búa til vefrallý þar sem nemedur eiga að nota vefi Morgunblaðsins og Vísirs til þess að finna upplýsingar. Rallýið felst í því nemendur eiga að læra að nota vefina og kynna sér þannig kosti þeirra. Ég hafði hugsað mér að hafa verkefnin þannig að þau eigi að fara inn á ákveðnar undirsíður og velja sér greinar. T.d. fara inn á gagnasafnið og leita að ákveðnu leitarorði eða finna á fasteignasíðum íbúðir til sölu í götunni sinni o.s.frv. Þar sem maður veit jú aldrei hvað er í fréttum hverju sinni! Markmið er s.s. að kenna nemendum að nota þessa vefi og finna sér efni. Þetta er hugmynd mín um vefrallý einnig væri hægt að útfæra þetta t.d. í málakennslu að hafa erlend blöð eða landafræði að reyna finna fréttir eða greinar frá ákveðnum löndum.
Þá er hugmyndin komin á blað og nú er bara að fara að vinna úr henni er það ekki næsta skref??

2003-01-31T05:51:00.000-08:00

Ég var að reyna að setja inn mynd en hún virðist hafa horfið reyni nú aftur

2003-01-31T05:50:00.000-08:00

2003-01-29T14:57:00.000-08:00

Framtíðarsýn
Þegar ég spá í framtíðina þá sé ég fyrir mér að ég komi til með að nota tölvur mikið í starfi. Ég gæti trúað að ég hefði heimasíðu fyrir mig og fjölskylduna. Ef ég verð í bekkjarkennslu er líklegt að ég yrði með síðu fyrir bekkinn þar sem ég hef ýmsar hagnýtar upplýsingar og tengingar fyrir nemendur og foreldra. Hvað varðar heimili mitt tel ég að við munum vera með góða tölvu sem hægt væri að nýta til starfa og einkonota. Ég held að maður eigi eftir að nota sér meira að finna ýmsar upplýsingar á netinu sem maður er enn að leita að í blöðum og skrám. Ég vona að ég geti nýtt mér netið til þess að koma á framfæri upplýsingum og leita upplýsinga. Ég hef hug á að koma upp heimasíðu fyrir Dagblöð í skólum og sé þá fyrir mér að ég geti verið að setja þar inn verkefni og fleira þannig að kennarar geti farið inn á síðuna og náð sér í verkefni eða fengið ýmsar upplýsingar. Líklega mun ég áfram nota tölvupóstinn mikið en spurning er hvort sá búnaður að sjá þann sem maður er að tala við verði almennur fljótlega eða hvað? Framtíðarsýn mín í kennslumálum er sú að ég tel að þegar tölvubúnaður skóla er orðin betri þá eigum við eftir að nýta okkur betur að láta nem. leita sjálfir að efni eða vinna verkefni í tölvu. Það sem mér finnst standa í vegi fyrir tölvukennslu núna er að við þurfum að binda okkur við fáa tölvutíma betra væri að við gætum sent nem. til að vinna í tölvu þegar það hentar hvaða tími sem það er.

2003-01-28T14:22:00.000-08:00

Það held ég að þetta hafi nú gegnið vel. Er ekki best að æfa sig svolítið og setja hér krækju í skólann minn Breiðagerðisskóla

2003-01-28T14:14:00.000-08:00

Góða kvöldið!
Jæja þetta er allt að mjakast hjá mér ég fæ vonandi forritin á morgun og bíð spennt eftir að fara að reyna og vona að ég sé ekki búin að gleyma neinu síðan í lotunni. Ég hef verið að vinna að vefrallýinu mest þó í huganum og aðeins skoðað síður það ætti allt að smella á morgun. En nú ætla ég að reyna að vera svo flínk að setja hér inn krækju Morgunblaðið á netinu

2003-01-27T13:57:00.000-08:00

Aðstæður varðandi tækni!
Ég held að ég verði að byrja á því að viðurkenna að ég tel mig ekki lifa mjög tæknilegu lífi ef svo má að orði komast. Það er ekki lengra síðan en eitt ár að við hjónin eignuðumst nettengda tölvu á heimilið. Ég hef reyndar unnið mikið á tölvur og eignaðist fyrstu tölvuna 1994 gamlan jálk sem gerði sitt gagn þ.e. skilaði út fínum ritgerðum og létti mér þannig lífið í gegnum KHÍ. Það var svo í fyrra vor að við fjárfestum í Dell fartölvu sem var 6 mánaða gömul og full að fínum forritum. Þangað til hafði ég notað netið og annað í vinnunni auk þess sem ég var í tíðum heimsóknum í næstu götu hjá tengdaforeldrum mínum. Ég held að fyrsta tölvupóstinn hafi ég send 1995 eða 96 í KHÍ. Núna vinn ég fyrir Morgunblaðið og DV að verkefni sem kallast Dagblöð í skólum ég vinn það að mestu leiti í gegnum tölvuna þ.e. tölvupóstinn og skoða nokkuð erlendar síður um efnið. Ég fer a.m.k. einu sinni á dag inn á netið og um klukkustund í senn. Nettengingin okkar er álíka frumstæð og ég í tölvumálum. Þegar ég fer á netið liggur snúra þvert yfir íbúðina og á þann stað sem ég er að vinn á. Við erum s.s. aðeins með einfalda símatenginu þannig að hér er á tali mjög oft....... Þó aðstæður séu frumlegar tel ég mig þó vera orðna nokkuð góða í tækninni og finnst ég hafa mikið gagn að þessu námskeiði. Um aðra heimilismeðlimi er ekki hægt að segja að séu tæknilega sinnaðir. Dætur mínar um 15. mánaða gamlar finnst voða sniðugt þegar ég er í tölvunni og þá koma gjarnan litlir fingur og ýta á takka sem á einmitt ekki að ýta á. Húsbóndinn hefur lítið komið nálægt tölvum en er þó allur að koma til og er að verða fastagestur á fasteignasíðunum þar sem við búum hér í 2 herb 60 fm íbúð 4 manna fjölskyldan og leitum að stærra húsnæði. GSM síma eignuðumst við árið 1998 þennan fína Nokia síma sem virkar eins og nýr ennþá. Ég uppgötvaði þó ekki alveg strax SMS skilaboðin en er orðin nokkuð leikin núna og nota þau töluvert. Það sem ég nota hvað mest í starfi mínu og einkalífi er tölvupósturinn ég sendi gjarnan vinum og ættingjum erlendis bréf með tölvupósti og finnst ég sjá mikla þörf fyrir að nota þennan samskiptamáta ekki hvað síst í samskiptum við heyrnalausa mágkonu mín sem býr í Svíþjóð. Ef ekki hefði verið til fax, tölvupóstur eða SMS hefði hún t.d. ekki frétt að því að systir hennar eignaðist stúlku í dag fyrr en eftir nokkra daga. En skilaboðin komust á leiðarenda með hraði í gegnum tölvupóst. Þetta finnst mér frábært!!!

2003-01-24T14:44:00.001-08:00

Hver er ég!! Ég ætla að segja ykkur aðeins frá mér. Ég heiti Auður Huld Kristjánsdóttir, ég útskrifaðist sem grunnskólakennari 1997 og hef síðan þá starfað í Breiðagerðisskóla í Reykjavík. Reyndar hef ég verið í barnsburðarleyfi síðan í haustið 2001. En þann 5. nóvember 2001 eignaðist ég tvær dætur. Fyrsta mánuðinn voru þær kallaðar A og B en um jólin 2001 voru þær skírðar Harpa Dögg og Hildur Ýr og pabbi þeirra heitir Jóhann. Þær eru nú orðnar 14 mánaða og hlaupa um allt og eru ýmis undir borðum, uppi í sófa eða gluggakistum. Mér fannst ég s.s. ekki hafa nóg að gera með þessar tvær og haustið 2002 skellti ég mér í nám í framhaldsdeildinni í Kennslufræði og námsefnisgerð og því er ég nú hér á þessu námskeiði. Ég hef auk kennslunnar einnig unnið sem verkefnisstjóri fyrir verkefni sem kallast Dagblöð í skólum. Það er samstarfsverkefni Fræðslumiðstöðvar Reykjavíkur, Morgunblaðsins og DV. Verkefnið felst í því að ég er milliliður blaðanna og skólanna í því að útvega skólum kennsluefni og dagblöð til að vinna með. Ég stefni að því að fara aftur að kenna í maí en þá er leyfinu lokið og litlu dúllurnar mínar þurfa þá líklega að fara í pössun. Ég er enn að bíða eftir að fá forritin en ég á von á að fá þau um helgina. Hins vegar er ég búin að skipuleggja svolítið í huganum hvað ég ætla að gera á vefsíðunni og hef áhuga á að gera síðu um Dagblöð í skólum. Kveðja Auður

2003-01-24T14:44:00.000-08:00

2003-01-20T13:08:00.000-08:00

Halló
Nú hef ég ekki prófað að skrifa í 3 daga en vona að þetta sé að komast í lag. Ég er að bíða eftir að fá forritapakkann til þess að geta farið að prófa mig áfram.

2003-01-15T13:20:00.000-08:00

Jæja nú er ég komin heim og er að prufa hvernig þetta gengur á heimaslóðum...

2003-01-15T07:47:00.000-08:00

Nú er ég búin að kaupa mér aðgang og vona að hafi gengið upp. ..

2003-01-15T07:02:00.000-08:00

Nú er ég að prufa hvort þetta gangi hjá mér

2003-01-15T06:39:00.000-08:00

Góðan dag!!
Ég heiti Auður og er nú um það bil að læra á þessa miklu tækni að geta skrifað dagbók og senda hana út á netið. Ég er núna á námskeiðinu Nám og kennsla á netinu og er að reyna að fylgjast vel með en á það til að verða svolítið eftir á og þá er nú gott að hafa góða sessunauta.